LASU DI FAMILIA

Familia e sangi, familia e amizadi
e tudu kel forsa di vontadi
pa nu podi sta sempri djuntu
ta luta pa kel me ku bazi na amizadi
sem dipoz bem kobra

Si bu ri n ta ri, si bu txora n ta txora
ora ki ta dueu ta duem ami tambe
E ka um lasu di papel e um kuza
pa dura pa tutu tempu

E forsa di gravidadi
pa aguentanu pe na txom
E kel ramedi ki ta sirbi
pa kualker situasom
sta prizenti pa eternidadi
i nau pa kaprixu di um momentu

Lasu di familia e forti sima asu
xeiu di amor, jenerozidadi i ternura
kel ki nu mesti pa nu luta
sempri pa noz ispasu

Kada um ku si prublema ma si bu sta safu
txiga pertu bem toma kel abrasu forti
nem ki for di mez-a-mez e sima ki fosi onti

Familia ta kumesa ku doz di kada bez
fazi konta ku mi obi dretu
- um maz um e igual a trez -
si tudu kori dretu
kuatu sinku seis sima na kel bez

kada um di noz e um elo forti
di um korenti ki nu ta kre pertadu
nunka lasu pamo korenti e inormi

Primo e sima irmon padrinhos e mai e pai
vizinhus nu ta txoma tio
e nhaz amigos e tudu nhas irmons
ki n ta guarda dentu kurasom

Familia e tudu kel ki krenu dretu
e di sangi e tambe di amizadi
nu ta guardal dentu petu
pa kuranu ora ki nu sta ka sabi