KEL KABU

Pa kenha ki ka sabi
N ten ki fla-s
ma ten um Kabu
la na meiu di mar
ki e nos grandi rikeza
sabi sima sabi e sabi

Pa kenha ki mesti sabi
N ten ki mostra-s
ma kel kabu ka por si
gentis ka koitadu
nem ki fari nosenti
spertu sima xibinhu

Pa kenha ki dja sabi
N ten ki lembra-s
ma nos kabu e grandi
nos e ka si donu
ma nu ta djobe-l dretu
pa nu dexa-l ku jetu

Pa kenha ki ka kre sabi
N ten ki pidi-s ke pa
di zimola na mundu
labanta alebi e feiu
ka nhos bota na txon
sakedu di kosta palbesa

Nu bai di mon dadu
bai konxi es kabu
tera di morabeza
lugar di sol i mar
undi sodadi e kantadu
i tristeza e badjadu
na morna ou na rapikadu

nu bai sem presa
bai perdi na tempu
poi midju na pratu
i bon grogu na kopu
katxupa ku xeren
kuskus ou pastel
na trisnota ou batizadu

Nu bai di petu abertu
bai da un bokadu
di nos saber na kabesa
pa nu inxina tudu fepu
ma nos kabu e verdi
di speransa i toleransia
di juventudi i vivensia

kel kabu tem pasadu
futuru e nos trabadju
kada um voluntariu
dotor i operariu
nu djunta nos mon
nu fazi pa kel kabu
kel ki nu ta pidi
pa kada um di nos