SABURA

Sabura é um kuza sabi
ma é ka ta dura
sabura é doxi
sabura é kenti
ami é mel
abó nha vulkon
kalor di bu korpu
ta fika na lenbransa
ora ki alarmi ta toka
pa kaba ku kel bom

Nos kama ta fica baziu
na kel banda
ki bu korpu ta diskansa
friu sta toma na mi
riba ta manxi
dja bu bai bu leba
kel kentura
ki ta farta-m tudu dia
dentu kurason di invernu

Nesesidadi di dia-a-dia
ta obriga sakrifisiu
ké sta lonji di bo
ta luta ku vida
ta lamenta bu auzensia
tempu ka ta pasa
N ta konta oras
N ta konta minutus
sima um kondenadu
ki sa ta paga penitensia

Ta spera txiga di tardinha
Pa N podi inbrudja
na bu korpu
pa nu fika um só
ta fazi kel kuzinha
pa nu kurti sabura
sabura é um duensa
inda bem ki ka tem kura
ami é um duenti terminal
sima bo ka tem igual

— didikadu a nha mudjer "lili"