DEZ IRMON

Kez mininus ki n konxi dja muda sa ta straga. MIDJOR BU ABRI ODJU!
Kel ki bu toma oji manham bu ta paga. DEXA DA PA DODU!

Dez irmon ninhum ka sai ses Mai. Largadu da mon. Padrastu era ses Pai. Bumbudu na kosta ez kria pertu mamai.
Es passa fomi, ez pasa sedi, ki nem ilhas largadu na osianu, izuladus pamo Pai era auzenti, autoritariu, mal idukadu, indiferenti tinha ez injuriadu.
Ez kria djuntu tudu na konkordia gosi vida sta duru kre das diskordia. Mininus dja ka kria. Mininus dja ka muda. Mininus sta bira doenti. Maz grandi tem di tudu ma kode nada ka tem nem pasadu nem futuru. Lutadu pa emansipasom pamo situasom ka staba bom. Mai Negra tinha munti kada um ku si prublema. Uns prematuru otus tinha vida dura rejimi ditadura trokadu Pai ki era munti. Tudu branku. Tudu Buru. Mai Negra tevi ki muda, é fla sangi ki ta kura. Dez irmon oji é izemplu na tudu kau. Bem bistidu. Bem kalsadu. Kabelu ku peli bem tradadu. Sima selebridadi. Nu tem ki txiga pertu pa nu odja ma saude ka sta bom, feridas teni korpu ta podrisi. Mininus sta mariadu infetadu ku kankro mal tratadu sta fika diskontroladu. Kabesa ka sta odjadu, kurasom sa ta sufri, sta mal alimentadu. Amor ke solusom. Barriga sasiadu ku bom idukasom. Pa ka tem derame serebral nem infarte fatal.

Nsta odja dez irmon tudu djuntu dadu mon. Nsta odja uns magro otus gordu. Nsta odja uns ta subi otus nunka tra pe di txom. Nu kuida dretu di noz Dez graozinho. Si nu ka kaba ku kez kankro e ta kaba ku noz.