PA AJI DRETU

Pa kenha ki inda ka sabi nunka e tardi pa rapendi.
Fazi u ke dretu ka fasil, ma e ta djudanu bai em frenti,
tudu dentu ruspetu. Um kuza ki nem tudu algem tem,
pamo nu sabi ma sentimentu e algu ki ta bai ta bem,
Nunka e ka ta kaba e ta sta sempri em ekilibriu.
e ta tokanu pa mal o pa bem nunka e ka ta para,

E sertu ma kada ladu puzitivu tem si ladu negativu
e klaru sima vidru frajil mo kunfia na um individu
i ta korta riju nem traisom ta satadjanu spritu
Kada um ta spia pa si spedju ma refleksu e inversu

Menuz bu da maz bu ta toma menuz amor e maz disprezu
Menuz vontadi na korpu e maz prigisa. Bu sa topa?
Menuz amizadi e maz xatisa Inverti kel ki ta importa
tudu tem um ladu A tem um ladu B e so bu skodja
kal ki bu kre poi ta toka? e sertu me ka so bu pe ki ta tora

Tem kuzaz ki ka tem tadju sima pur izemplu fala o ku ka debi
aji tardi fora tempu o aji na bom mumentu ora ki um amigu mesti
tem kuzaz ku ta kre fazi pa bem ma ta sai tortu bu ta fika ka ta sabi
kada jestu tem si kombersu intom ka nu riaji mal si nu obi ki nau

asom-riasom kauza-ifeitu tudu tem um kuza ki ta influensiau
pa bu sigi em frenti pa bu tem razom di fla dipoz ma bu ka rapendi
ma bu fazi kel ke dretu Na ora sertu pa kenha ki meresi. Bu sa intendi?