RATADJU

Djes txomal di munti nomi ma si nomi e ratadju
e ka sta vivi sima um omi si vida sta tudu ratadjadu
sem ningem sem vontadi sem trabadju
manenti ta pasa fomi, koraji fitxadu

dje djobi trabadju e ka atxa trabadju e mesti trabadju
ratadju ka ta botadu ta tenedu guardadu
na kau ku ta mesti sempri na armariu di baxu
djuntu ku pa ku basora, ku baldi, ku skova
tem si valor ma e ta fika sempri ku taxu

suju i uzadu, pa laba, pa reia, pa ruma
ma dipoz seda ku setim ki ta apruma
bankadu na meza na dia di istreia bunitu na filmi
ta kumi ta bebi ta lembi dedu, enfim
ratadju ta fika ku restu pa kela ke ta sirbi

si ki mundu e fetu kenha ki maz ta produzi
ki na pratu menus ta teni i maz ta sufri
ma nunka bu ta odja ratadju ta botadu
pa algum kuza al sirbi nem ke so pa limpa ...
di kada um

e ka tem kaza e ta mora
e ka tem trabadju e ta implora
e ka ta kumi du bom, so sopa
ratadju e tudu kel ki nu ta odja

e uzadu, stragadu, injuriadu disprezadu
kondenadu, maltratadu, abandonadu
ma sempri ku kabesa labantadu
ratadju e tudu nos ki nada ka dadu
ma sime ka ta da pa fraku