JOGU

Na nha kaminhada pa ultimu morada, tem txeu kuza ki n ta odja, munti kuza ki nunka n odja, maz inda ki n ta fika ku gana odja ke pam podi mostra kez algem ki nada ka sta odja ma kaminhu e lonji. Ka bali pena kori nem pidi diresom, kada um di noz ta fazi si kaminhu sima e sabi.

Nu sta num labirintu sem luz, nu ta anda txeu bez a toa, sem sabi kuze ki sta noz frenti, az vez nu ta kaba pa fazi mesmu kaminhu maz ki um bez o nu ta toma kel maz kompridu pa lebanu kel saida ki nu mesti.

E moda um jogu, na kada kurva podi sta um porta pa nu avansa pa otu nivel o intom pa atrazanu maz inda. sabi skodji sta na noz mon, novatu o avansadu, nu tem ki tem kautela pamo nu tem so um vida na noz mon, ka podi stragal a toa sabendu ma tem maz vidas ta dipendi di noz jugada.

Kela ki ta torna ez jogu maz interesanti, tudu pontu ki nu fazi e kel ki nu atxa ma nu meresi. E ka kuantidadi di tempu ki nu sta na el, ma sim kualidadi di noz jogu ki ta ponu evolui. Kantu maz kuza diferenti nu fazi maz abilidadi nu ta ganha i maz visiadu nu ta fika, maz gana nu ta teni na kontinua ta kaminha sem importa ku atxa saida, somenti konsentradu na goza es uniku vida i fazi game over dura ki txiga.