UM TORNADU

Imajina kada um di noz moda um tornadu
ar frio ku ar kenti kuazi ta toka ladu a ladu
nu ta parsi di ripenti nu ta kria nu ta avansa
nu ta altera tudu noz frenti undi ki nu pasa
sima nu bem si ki dipoz nu ta dizaparsi
nada nu ka trazi tambe nada nu ka ta leba
so noz marka ki nu ta dexa na txom
imajina go 6 mil milion di tornadu
tudu dia au mesmu tempu pa tudu ladu
sima um garafa o ki bu tral tudu agu
e ka ta fika baziu e ta fika xeiu di ar
na kada pasu nu sa disloka algu di lugar
nu ta dexa pegada ma nu ka ta disloka so ar
uns ta tra otus ta poi
uns ta panha otus ta bota
uns ta mexi otus ta toka
kada um ku si intensidadi
ku si velosidadi ku si vontadi