NU DJOBI KEZ FIDJU SEM MAI

Ami n’tem pena kez mudjer, tem fidju pake?
Ta arma em mudjer si bu ka sabi ser mai e kuze

Ta poi koitadu na mundu ku konsiensia pizadu
Na verdadi e pezu ku ka kre karega, kre poi di ladu
Ta pou ta anda diskalsu ti undi ku kre txiga
Ma afinal abo e atriz sekundariu na palku di vida

Sima ta dadu e si ki ta tradu
Vida e ka pratu pa kumi kaladu
Ku pe trokoladu na kaminhu mariadu
Bu pol na bu brasu, fazel xinti amadu

E frutu ta kai di pe, ta fika na txom ti podrisi
Um Kastigu sem pidi, nu sabi ma ka ta fika ti si
Avo-mai, tia-mai, vizinha-mai, rua-mai
Kel ki krial, undi ke dexadu, e la ke si mai

Mai e um n’tem mil i um otu ki ka tem ninhum

Largadu na rua sima lixu
Nada e ka sabi so kabesa rixu
Pamodi e ka dexadu ser fidju
Rua-madrasta tratal moda bitxu

Pa noz tudu ki tem mai pa djobenu
Nu djobi noz irmon orfao nu dal susegu
Nu djobi kez mai nu daz konsedju
Nu djobi noz mudjer nu daz ruspetu
Nu djobi noz frida nu kura dretu

pai ku mai di amanha e kel fidju ki nu kria oji
fidju di amanha e di kaza o di rua e ka ta skodji
vida e midjor prenda ki nu ta dadu
el e di grasa ka nu dal envenenadu