RASEKADU

Oji n'labanta rasekadu, dam gana ba kompu kabesa, buteku staba xeiu, doz kopu riba meza, um pa mi otu pa nhu padri. Um di kada bez, di kuribati, um e pa santu, doz e dum bez. E ka num misteriu, purifikasom di pekadu, tudu na kumprimentu di ministeriu. Tomai i bebei. Tudu! Sem kumentariu. Bolsu sta xeiu, frutu di kampanha na konfesionariu. Mudjer di kandidatu ta konfesa adulteriu. Konvivi ku pekadu e mison di um misionariu, karni ta da frakeza ma el e omi seriu. Pastor i salvador di mudjer karenti. Ker dizer, krenti.

Traz di balkon, fidja di patron dja raganha denti, ku rostu na txom pa omi grandi ka dal kosta mon, so tiatru. Nha boka sta fitxadu. Tudu algem paradu. Dja soma la na porta sinhor ajenti, rostu di autoridadi, runhu pa fora ma dja nu sabi me tudu dentu legalidadi. Dia di inspesiona lugar, sta tudu kontroladu, kel troka di olhar, boka kaladu, ta fla sena ensaiadu. E bem fazi fiskalidadi, la na kuartu di fundu, patrom bai si traz ku minininha pa frenti. Ami djam toma maz um pa santu i doz pa dentu. Patron bem el so, da porta na txabi. Ningem ka odja, ka sabi, ningem ka sta atentu. Jugada ka ta kaba, rapazis sta aliviadu, tudu tratadu. Um bokadu e pa kaza otu bokadu pa sinhor ajenti, negosiu ta anda. Tudu algem kontenti. Pai nosu ka txomadu li, omi di fe poi pe na fresku. E dexam ku um pa santu ku doz pam da dum bez. Ave Maria. Santu dja tinha um timi di basket, di meu era maz di futibol. Sinhor ajenti nem sinal. N'tem ki spadja pe.

N'labanta rasekadu, n'tem ki ba kompu kabesa. Kaza staba baziu, ami n'ta txiga n'ta kamba. Retu sigundu pizu, terseru porta ladu direita. Ningem n'ka odja, so kes doz perna riba kama, um pa ixkerda otu pa direita, di kes kuza ki ta labanta mortu. E pa tra padaz? Tudu dum bez. Um pa frenti i doz pa traz. E so kurtisom. Si dje kre, nu ta bai sigundu pratu. Axai i kumei. Tudu! Sem fastiu. Ora di ba panha algum tistom, satisfazi mudjer di kandidatu ku promesa di amor pa djuda mata resaka. kel ki podu na boka e kuza dadu. Misom di um pobri koitadu, povu sta pasa fomi, karni maz forti ki pexi. Tudu tem solusom. Kal ke ramedi di mudjer krenti? Ker dizer, karenti? Um pa frenti i doz pa traz. So ma dje raganha denti. Ku poku, povu ta fika kontenti.

Traz di porta Maria ku odju na braku fixadura, boka fitxadu ta ba ta toma mo fitxadu, oji di patroa, manham di kandidatu, kada um ta fazi si kampanha, kada um ta tra si bokadu. Korupsom ta kumesa na kaza. Kontatu ku povu ta fazi parti di kampanha tem ki ta da nem ke kel poku, tudu algem ta ganha. Maria e rapariga dretu, fidja gentis dretu, di dia ta limpa, dexa kaza bem rumadu, patroa susegadu, kandidatu aliviadu, bolsu bem aviadu, di noti e di povu. N'konxel dretu mi ku nhaz trokadus, 10 dum bez. Mininu na skola, pai ta pidi zimola, tem ki ta ranja fregez, tem ki ta tra pa fim di mez. Ami tambe n'sa tra di meu, padaz-padaz o tudu dum bez, um pa riba otu pa baxu. Turmodi dja kai na mar e pa nada, sinau ta bai pa baxu. ma dja kumesa tem ki ta kaba. Ora dja da tem ki ta spadja, komisiu dja kaba, papel dentu bolsu, nha votu djam skodji.

N'labanta rasekadu tem ki ba diskansa kabesa, la na kubiku. patroa sta speram pa dam sentensa trokadu doz noti fora kaza, mininu sta duenti nem um tistom pa ramedi. Dja bai. Tudu dum bez. Vinti pa Maria restu fika la na buteku. Manham e otu dia.