FABRIKA

OMI KA TA VIVI SO DI SONHU
FITXA ODJU BU VIAJA
PA TUDU LUGAR KU IMAJINA
AGO ABRI BU POI MON NA BOLSU
I KUMESA KONKRETIZA (KAU STA MAU PA BO TAMBÉ?)
É SIMA N’IMAJINA.
KA BALI PENA BU SUNHA TXEU
SI BU BOLSU TA KONTINUA KEL MÉ
OJI N KRÉ ABRI UM FABRIKA
KA DI SONHU MA SIM
DI TUDU KI MAZ STA FAZEM FALTA
MUNTI DINHERU. UNDI OPERARIU E JERENTI É MI
KADA LINHA DI MONTAJI
STA NA NHA KORPU INTERU
DJAM KRE BIRA UM FABRIKA
PAN KA FIKA TA PENSA SÓ NA GITA
MA SIM NA KUZÉ KIM PODI FAZI
KU EL KU MUNTI KUMBU

SI KI MUNDO DJA BIRA
SÓ BU TA KONSIGI ATINJI BUS META
KU PELU MENUS SEIS DIJITU
NA BU KONTA BANKARIA
POR ISO NHA FABRIKA
DJA STA NA ANDAMENTU
N TENI TXEU KLIENTIS
TXEU PROJETUS PAN SATISFAZI
MA SO UM IDEIA NA PENSAMENTU
INVISTI NA EL SEM ORARIU FITXA
24 HORA TA PRODUZI
TA SPERA DIA DI LANSAMENTU TXIGA
PAM INVADI MERKADO
KU UM PRODUTU DI KUALIDADI
KI TA KORI KU KEZ LIXU
KI STA LARGADU NA PRASA
SIMA BANANA UAIAUAIA BUNITU PA FORA
MA O KI BU TRA KASKA É UM DISGRASA
PA DENTU É PODRI KA BALI NADA

N KA TA FAZI STUDU DI MERKADU
N TA INVISTI NA LINHA DI PRODUSOM
STA SEMPRI ATUALIZADU
INSENTIVA FORMASOM
FIKA NA UM NIVEL AVANSADU
SER MODELU NA MERKADU
FONTI DI INSPIRASOM
PA TUDU OPERARIU
KI STA LABUTA NA NHA FABRIKA
OMI KA TA VIVI SO DI SONHO
DINHERU KA TA TRAZI FILISIDADI
MA É TA DANU KAPASIDADI
PA NU RIZOLVI NOS PROBLEMAS
PA NU KA VIVI DI KARIDADI
NU TEM KI POI NOZ FABRIKA TA FUNSIONA
NA MASIMU PUTENSIA KA PODI PARA
TIMENTI NOZ SONHO KA KONKRETIZA