ABO E BOM

Finka pe na txom
ka bu kai na tentasom moz
da valor na kel ku tem
dja bu sabi ma bo é bom
es tem ki sabi ma
nu tem um dom di noz
É si.

Bu ka mesti spera pa ninguem bem flau
kuze ku tem ki fazi na bu vida
podi tem serteza me ka bu mai
nem bu pai nem stado ke saida
abo é kapaz ka bu xinta ta spera
pa bu ser um kapataz
ta fazi so kel ki bu mandadu
moda um robot ta trabadja
só pa fim di mez dizanimadu

ka bu kulpa governo
ka bu kulpa ningem
pa bu triste situason
labanta kabesa fika sperto

sta na ora di bu mexi um poku
korda pa vida sai di iluzon
txeu algem ta sunha
tem munti dinheru
um kaza a manera
y um bruta karu na porta
txeu algem ka sabi ma
sunha é primeru
sigundu nu tem ki fazi
pa dipoz nu bem inkosta

kada um di noz tem um dom
ki vida ta danu
kantu maz bu alimental
maz é ta djudanu
pa nu podi sabi ken ke noz
y kuze ki nu kre fazi na noz vida

vida é ingratu txeu algem ta fla
ka bu spera pa vida sakedu
bu tem ki motiva
ora kes odjau ta fazi
algum kuza ki bu gosta
ki ta dau motivu di labanta tudu dia
xeiu di vontadi di finka pe na txom
y mostra ma bo e bom