HOMI KA TA TXORA

Será ki bu ta ri
si bu teni gana txora?
Homi ka ta txora.
Um mintira ki n ta obi
tudu ora dentu nha sosiedadi
Ma felizmenti sempri n prendi
ma dor ka tem idadi

Ami n ka kre nha vida makiliadu
nka kre konstrui um kastelu di karta
ku telhadu di vidru
nha spinhu na rostu
ku nha sapatu uzadu
nha kaza bedju
ku nha bilheti otokaru
ta tram gana ri ta dam gana txora
pa limpa tudu magua
moda txeia na ladera
ta leba tudu kel ki n ka kre
o ki omi grandi la di riba
ta txora pa labantanu mural
pa nu sta sempri prontu pa pior

Sera ki txora ke ramedi?
kel ki dja sta la é ta fika
noz tudu ta da topada
ma poku ki ta dal doz bez
na mesmu pedra so kenha ki kre
por isu n ta ri hora ki n kai
pam labanta ku maz animu
i maz forsa finkadu na kanela
pa aguenta txeia ki ta kori
ora ki bu txora bo ku kelotu
ku kelotu
ku kelotu
ku kelotu...