MANUAL DI INSTRUSOM

N'sta mesti manual di instrusom,
pam podi dixi tera poi pe na txom,
labanta kabesa toma um puzisom.

N'sta mesti sabi tudu crack,
ku tudu faq, ku tudu truki
ku bipi ku tikitaki,
konxi tudu karta di jogu. Ser um kraki.

Vida nu ta dadu di mo bejadu,
mo ke ta uzadu ningem ka ta flanu.
E ka di oji ki nu sta li,
ma ti oji nu ka sabi, si
noz e uniku inkilinu dez mundu.

Kantu mil anu dja pasa,
mesmus perguntas ta fika sem risposta:
Kem ke noz?
Di undi nu bem?
Kuze nu bem fazi li?
Undi nu sta bai?

E ka um jogu
ma munti algem sta fazi aposta.
Pa kada novu vida ki ta bem
e maz um duvida ki ta kria.
Sobripopulasom
ta obriganu pergunta tudu dia.
Sera ki mi é so maz um pesa
ki podi diskartadu?
Anoz e imitasom di kada um
mo dizenhu dikalkadu?

Nu ta kori traz di manual
pa nu sabi tudu regra dez jogu,
nu ta kaba pa komplika
ku tudu ki nu atxa poku.
Kantu maz nu buska
mas lonji nu ta fika,
maz duvida pa noz bokadu di vida.

Anoz e kopia di noz pai,
versom maz evoluidu,
ker dotor ker bandidu.
Ami djam dexa manual pa la,
kel ki n'ka sabi n'ta pergunta.
n'tem serteza ma tem algem ki sabi.