BEM DI FORA - PARTE 5

Dimingu ku Palu sai ta kori, libra karapati ki Palu tufudja, labanta rusu. Kantu ez txiga ez atxa Numaia dja pega Mani na piskoz, stribilim pa larga. Xanu Barboza staba riba kutelu e odja fumu ta labanta dentu fundu ku gritaria.
— N'ta matal. Pa largam n'ta matal. — El ku Benvindu ez larga trapitxi, soti rostu baxu num korida pa ba tadja disgrasia. Ez pasa na porta Nhu Pulenta Bia ki staba xintadu na si leitura ki nem kabesa e ka labanta. Dje sabi ma antiz tardinha ez ta poi sabi, kantu bez djes poi gera...

Ora di almosu sta kuaji ta txiga, benda ka sta mau pa Juana.
— Nha fregeza! — Para um mudjer frenti Juana.
— Mo ki sta fixom?
— Sta 110. Ma n'ta fazi nha 90. Nha nogosia. — Juana labanta kabesa rinka um grasa.
— Maria! Ah nha prima bu sta fazi poku mi? — Maria staba janota. Ropas finu, kabelu tratadu, okulus sukuru ta fla artista.
— Juana dixpaxa ku venda, n'ta bai fazi uns kompra n'ta bem buskou. Oji bu sta djuntu ku mi. — Maria da rinkada ku surizu di algem ki sta filiz di vida. Juana fika sakedu ta odjal ta kamba na skina imbrasadu ku um rapaz di fatu ku gravata e poi ta sumara bida.

Dimingu ku Benvindu katrisa ku Numaia ti kes txiga la riba kutelu, undi ta mora gentis Barboza. Benvindu ku Xanu e doz rapaz nobu ki ta djuda ses pai, Don Pedro Barboza, fazi grogu i orienta nogosiu di familia. Fladu me midjor grogu dentu Santiagu.

Benvindu bem ku trez kaneka na mon ku um garafom di kel bom, baxu brasu.
— Nhu xinta li nhu bem flanu pamodi ki nhu kre mata Mani. — Numaia djobi Dimingu, djobi Benvindu, rinka um sepa grasa, dipoz e poi rostu seriu e fla.
— Ná n'ta matal sim. Se ka oji e manham. — E imborka kel kaneka dum finkada. Benvindu panha garafom poi maz um pe.
— Nhoz atxa ma n'ta matal? — Numaia kontinua.
— Ma moz la e bakam. N'ka ta matal nau ma n'sa pam dal um bom nobidu pe dexa bakamdeza. — Rapazis spia pa kumpanheru ku gana ri.
— Komu djam sabia ma el e tem fraku pa Dona Presioza, mudjer freska tambe. Diskulpam Dimingu e bu tia ma e sime. So Mani ki ata da pa dodu... — Maz um finkada di grogu.
— ... intom n'ta sta so na trosa ku el... — Dimingu inkosta na pe di papaia ki staba si traz, e bebi si grogu. Afinal Numaia kria fazi aranju di Dona Presioza ku Mani. Komu Mani atxa ma Numaia staba na katxorisi e panha e difamal na mundu.

— Djo kenha ki dja txiga la! — Dimingu spia pa traz timenti Numaia sta poi maz um pe. Benvindu kamba dentu kasa. Era Palu, Mani ku Xanu ki txiga ta ri ta konta partis. Dja staba maz trez kaneka riba bankinhu ki Benvindu trazi, garafom pa riba metadi. Kombersu bira animadu bu ta odja Numaia ku Mani ta konta ses storias sima ki nada ka ovi. (continua) (parte 1) (parte 2) (parte 3) (parte 4) (parte 6) (parte 7) (parte 8) (parte 9) (parte 10)