BEM DI FORA - PARTE 4

Pasarinhu ta kanta dum banda, silensiu na obidu dotu banda, buru ta zura, dipoz tudu ketu so plantas ta badja na som di bentu ta kumpanha inxada na txom kompasadu. Muzika sabi di obi dentu Kutelu.

La na Praia, Fransedja para riba porta merkadu, poi karga na txom ba ta bai, tem ki da lugar pa otu ka podi para txeu, e entra ku sai ki ka ta para timenti gentis ka txiga fepu di fora. E buzina, e gritaria, omis na pasu largu, saku rastadu, fixom bazadu, lensu maradu na kabesa, panu stendedu, verdura, ortalisa ku mankara, midju ku dosi di tera, rapasinhu ta kori...
— Pega ladrom. Pega fidju p***. —

E so korida ku rabolisu, ki Juana sa ta djobi lugar di stendi si negosiu. Dentu merkadu sta tudu kumpradu, okupadu, e na rua ki tem ki ser. Es e munti, kenha ki txiga primeru stendi si panu. Pa riba paseiu ka podi, to ki fiskal di kamara txiga e mo fitxadu ke ramedi. Kada um ta rabida sima e sabi. Mas um dia di luta dja kumesa.

Maria, kaza inda e ka txiga, Tabanka-Mar, Cockpit, Flampa, Zero, Oasis Praia-Mar, si tem maz kau di bai, Maria staba la. Korpu sta abituadu, tora pe pa xinti sabi, tora koxa pa sustentu. Oitu ora palmanham nhaku karu para frenti kel primeru andar la Palmareju, sinku minutu dipoz Maria sai. Dia dja sta ganhu, diskansa korpo pamo logo tem ki leba si prima pa konxi otu Praia. Praia sabi.

Dentu Kutelu, Palu ku Dimingu sta xintadu na kombersu, trabadju sta avansadu ki djes poi na lembra tempu. Kantu es ta daba ku pedra na janela Nha Pala, mata lagartixa prinda na ombrera porta, inxada Mani kes ta meteba na kintal di Numaia, ta daba gera ki ka ta kaba. Tempu mininu.

Dimingu, Palu, Juana ku Maria es kria djuntu. Palu ka konforma kantu Maria dixi Praia, desdi mininu es ta imbrudjaba na kumpanheru ma oras kes staba frenti dotu algem, Palu era maltratadu, disprezadu, feiu kuza odja. Es fazeba planus tudu kuatu, kazamentu na mesmu dia, ba tora pe na Praia..., ma kuzas muda, mundu ta da volta.

Oji sta Juana ku Maria na Praia, Dimingu ku Palu la Kutelu. (continua...) (parte 1) (parte 2) (parte 3) (parte 5) (parte 6) (parte 7) (parte 8) (parte 9) (parte 10)