BEM DI FORA (PARTE 10)

Jantar foi rapidu pa Juana, e ka staba dretu, di tal manera ki antiz dez sai di ristoranti, Maria tevi ki ba dal um jetu na pintura. Dja staba tudu imboradu di tantu txora. Tem kuzaz ki algem ta nasi ku el, tem otu ki bu ta prendi ku vida. Sabi sta na meiu d’algem e ka ku Juana. Simplisidadi ke tem na el ka ta kombina ku lugariz ki Maria kre lebal. E tem ki ta intua i Juana e algem ki kre sta intuadu sima si prima.

Kantu ez sai di dentu kel kaza banhu e bem ku um kuza na kabesa (keli e nha vida, keli ki n’kre pa mi, kabelu limpu i bem kompodu, ka kel transa xeiu padja di tantu karega saku midju dentu Kutelu, peli lizu i brilianti, ku unha pintadu, ka kanela rusu ku kalu na pe so di anda traz di lenha, agu ku limaria, bexu pintadu ku rostu makiliadu, ka tizna ku txeru fritu ki ta nega sai...).

— Juana! O Juana kuze ku teni minina? — Juana djobi Maria spantadu.
— Bu kre matam di kurasom? Des ki n’sta li ta txomau, dja bu fika sima ku sta nosenti. Bu sta sunha kordadu? —
— N’sta so ta kuda bida Maria. Dja pasa. N’sta dretu gosi. —
— Bu kre bai kaza? —
— Nau. Oji n’kre goza dretu. Djam sabi kuze ki n’kre. — Ez panha sez mala, pagadu konta, pe na fresku.
— Nu sta bai diskoteka dipoz nu tem um festa la kaza nha amigu. — Karu aranka um traz dotu, dez bez Juana ka fazi fita, ate e pidi Jimy diskulpa.

Pasadu bom tardi riba Kutelu Renki Baboza. Antiz sukuru fitxa kumesa rumadu tudu pa poi dentu pa gentiz spadja pe. Don Pedro da kada kenha um litru grogu, Mani ku Numaia staba na stadu ki si ez ka pegadu ez ta kai, di modiz ki rapazis tinha ki katrisa ti ki lebas rostu baxu pa largaz riba kama. Dimingu ku Benvindu pega Numaia, Palu ku Xanu pega Mani. Ana pruveta e fla Nha Bibina pa dal keju pa rapazis. Bom keju di ovelia, famadu dentu Praia. Komu djez staba la ta bai, Ana fla me ta leba, e ranja diskulpa di ba spia miniz ki fika ku Dona Presioza dia interu.

Joao ku Fatima (Faty), seis ku oitu anu, minis spertus ta disgobedja dretu ez so. Faty ta fazi di tudu, ta fla algem grandi. Ana txiga faxi, Dona Presioza staba xintadu ta fazi masa pa pastel di midju pe ba bendi manham la Kova Purgera. Mosinhus di Praia to ki ta bem di Tarrafal ku Somada ez ta para la Kova pa kel kuzkuz kenti ku pastel di midju. Ez poi na kombersu trokadu Mani ku Numaia, Ana flal ma rapazis lebas pamo stadu kes staba ka ta daba pes bai num kau, la e fika ta sabi ma Juana ta bem la manham di tardinha.
— Djudam poi minis deta, ez xinta li sim pa djudam ki ez durmi nem n’ka da konta…— (continua...) (parte 1) (parte 2) (parte 3) (parte 4) (parte 5 ) (parte 6) (parte 7) (parte 8) (parte 9)