BEM DI FORA - PARTE 8

Rabolisu di sekador di kabelu misturadu ku muzika di Beto Dias ta toka (..."nos 2, nu tem ki ser feliz, amor e um kuza fundamental"...), bafadu pa munti voz diskontroladu di kez sinku mudjer dentu salon, bu ta fla ez era vinti i sinku di tantu barudju kes staba nel. Juana kamba ketu ku rostu na txom ku brasu kruzadu riba bariga ki e fadiga ku tapa si denti brankuadu kantu Zezinha fla...

— E bo non-presta, Maria forti bu dura. Dja bu ranja maz um cabritinha?-
— Na. E nha prima, Juana. E bem di fora oji. Logu e ta bai ku mi.— Zezinha djobi kes otu dentu rostu.
— Intom dexa n’ta pol na pontu. Oji e ta pinta manta. E ka si miniz?—
— Dja bu sabi mo ki n’gosta. Fazi sima ke pa mi. Ma Juana tra lensu di kabesa minina. Nha genti... – Maria splika Juana tudu e sai. E tinha um kompromisu la Hotel Marisol dipoz e tem ki bai Palmareju da otu ixpidienti. Juana sta na otu mundu, sima ke sta sunha. Dja staba doz ta tratal di kabelu, otu poi ta kompol unha...
— Ui nha mai, Jesus Maria.— Juana da um gritu kantu Zezinha pol sera kenti na perna pa depilasom. E ka sta kustumadu.

Dimingu ku si radiu dentu mon para na porta Nhu Pulenta Bia, antiz di torna subi la djuntu ku rapazis. E konta kombersu di Nha Pala e pidi konsedju. E ka dura mutu pamo Nhu Pulenta staba ku vizita. Na ta subi e poi ta pensa na kuze ke flal... (Nha fidju, ningem e ka di ningem, noz e tudu di nosu sinhor Jesus Cristo, so nu ta ruspeta nu ta kunfia na kumpanheru). Kantu e txiga la riba, ka staba ningem.

E kamba dentu traz di Palu, e odja Ana imbrudjadu na tuadja dentu kintal. La e fika sakedu ta spia, ti ki Nha Bibina soma si frenti, e fika mariadu sem sabi kuze e ta fla.
— Eris sta tudu la bera trapitxi.— Kode di Don Pedro, bunitona dentu si 18 anu, Ana tem seka ku Dimingu ke bira midjor amiga di Juana so pe podi txiga la na kasa sem prublema. Dimingu fadiga ku sai pe bai ter ku rapazis kantu e da konta ma Ana, ki dja staba traz di Nha Bibina, poi ta spial ta piskal odju. (continua...) (parte 1) (parte 2) (parte 3) (parte 4) (parte 5) (parte 6) (parte 7) (parte 9) (parte 10)