BEM DI FORA (PARTE 9)

Maria da um grito kantu e soma na porta salom. E txiga na pe di Juana pe odja midjor.
— Di zimola tram kel mon frenti boka, bu tem ki mostra kel surizu bunitu o ki bu ta ri. Nhoz ka atxa? — Rispondi tudu na um koru.
— Ayan.—
— Zezinha bo bu mata. Forti nha prima sta... —
— Na. Dja pasou propi Maria. Oji bu ka ta fatura, Juana ta tomou tudu. HaHaHa. — Maria djobi Zezinha ku rostu runhu pe kala boka ki Zezinha poi rostu na txom ba dentu buska basora pa ba ta limpa salom. Juana staba kontenti, era kuzas ke ta sunhaba me ta fazi ke ta kontaba Ana na ses kombersu.

La bera trapitxi, Don Pedro staba ta inxina Palu mo ki ta fazedu bom grogu timenti Numaia ku Mani, staba baxu tornera so ta purba si sta na pontu, ku karmal na mon ta impara na mai, sima ta sai kenti, inprigu kemas boka. Dimingu da rekadu Nha Bibina ma inda ez para um bokadu, Don Pedro e papiador, o ke kumesa ta papia di fazi grogu so Nha Bibina em pesoa ki ta pol kala. Xanu ku Benvindu sabel dretu, ti ki ez sta ku ideia na fazi plantasom di uva pa fazi vinhu, ma Don Pedro ka mutu ta fila ku ideia.

Para doz karom na porta, Maria bai janela e fazi sinal la pa baxu dipoz e fla Juana pa dixpaxa. Kantu ez dixi, Jimy ku Kareka staba na portom di fatu i gravata sakedu. Fazedu aprizentasom, na ora kamba na karu, Juana fla nem pa ka tenta, ma el so na karu ku Jimy e ka ta bai.
— Ami nem n’ka konxi rapaz Maria! N’ta bai djuntu ku bo. —
— Ta fika feiu si nu bai trez num karu i dexal bai el so. — Meia ora dipoz Juana rizolvi seta.

Xintadu tudu na meza, Don Pedro manda liga motor ki luz toma dentu kintal bunitu kuza d’odja, Si algem sakedu la kelotu ladu rubera ki spia pa Kutelu Renki Baboza ta odja o kel luz ta limia ta fla strela dentu sukuru. Ana staba xintadu frenti Dimingu, Palu na si ladu, na kelotu ladu Nha Bibina ku Don Pedro na ponta meza, Xanu ku Benvindu kada um na um ladu di Dimingu, Mani ku Numaia ta fixa meza.

Ez para um bokadu la Noz Afrika so pa fazi tempu antiz di bai pa ristauranti, tambe pa Juana ambienta midjor ku rapazis. Kantu ez txiga na porta Garden Grill, Juana dja staba maz a vontadi ku Jimy, ez bai ta kombersa na kaminhu. Sala staba xeiu, so algem finu di um ponta pa kelotu. Ez xinta ez kombersa um bokadu dipoz fazedu pididu, Maria rapara ma si prima staba um bokadu nervoza. E ka staba kustumadu.
— Fazi kel ki n’fazi, ka mesti tem medu nem vergonha. Tudu ta kori dretu. — Juana djobi Jimy ku Kareka ku um sorizu forsadu. (continua...) (parte 1) (parte 2) (parte 3) (parte 4) (parte 5) (parte 6) (parte 7) (parte 8) (parte 10)