BEM DI FORA - PARTE 7

Dona Presioza staba baxu pe di spinhu ta kotxi si midju diskansadu. Manham e ta poi katxupa riba pa almosu, ku kel kuzkuz logu sedu. Restu di midju e pa bendi i pa fazi xerem. Farelu ta guarda pa limaria. Na si batuku kompasadu na pilon, e da konta di tudu rabolisu di Mani ku Numaia, ma e fika ketu na si kau ta sumara. Dje sabitudu ses gera kuze ki ta da. So barudju.

Presioza ku Fatinha, mai di Juana, es era doz rapariga bunitonas na ses juventudi, ki tudu rapazis dentu Kutelu ti dixi rubera, ta txomaba di Diamanti Afrikana. Mani propi ta flaba ma Lucia e "Presioza di meu", di maneraz ki ti oji e ta txomadu Dona Presioza.

Bom mudjer ti kaba na nada, trabadjadera, kazera i kuzinhadera ki bali, ma tambe era rapariga freska o kontrariu di Fatinha. Ma ka tem ningem ki ta abri boka pa fla ma odjal na kunfiadesa, era sabida, ma sime ta kori pa tudu rubera ma Maria e ka fidja Nhu Intoni Preta. Kantu Maria nasi fladu me branda di modis ki ta flada ma kel dia nasi doz rapariga dum bez.

Mani ku Numaia manenti ez ta konta rapazis nobus storias di diamantis di Kutelu Renki Baboza. Dimingu staba xintadu ta sukuta kantu e lembra di si misa ke ta obi tudu dia di tardinha, ke dixi kutelu num korida pe ba buska si radiu di pilia ke skesi dentu lugar kantu e ba tadja Mani di "matadu".

Na ta pasa bera pe di purgeras e kontra ku Nha Pala.
- Nha fidju korda mosinhu. Tadja disgrasia di txiga bu kasa. Praia e sabi ma e prigozu. Deus ta bensuou ku bu mudjer. Koraji fitxadu.- Nha Pala bai na si pasu lentu ku um mon di padja ke ta kata pa Kutelu pe ta fazi un ramedi. E dexa Dimingu sakedu nosenti, ku xintidu dentu Juana. (continua...) (parte 1) (parte 2) (parte 3) (parte 4) (parte 5) (parte 6) (parte 8) (parte 9) (parte 10)