BEM DI FORA - PARTE 3

Di rinkada Kova Purgera, galu inda staba na sigundu sonu, Juana na terseru pasu di maré ke ta txiga Praia galu inda nem ka ta kumesa sprigisa dentu Kutelu Renki Baboza.

Hiace pa bai Praia tem ki ta panhadu la Kova, di modis ki era kansera na maré di bai, dixi ladera, fazi kaminhu kabra ti ki txiga na strada muntadu na buru maz vinti minutu ti Kova.

Onti tinha romaria la kaza Dimingu, e rekadu pa manda familia na Paiol, e pa kumpra keli na Fazenda, pa kumpra kelotu riba Praia, djobi yá baratu na Sukupira, ku kez manduxu na loja xina tambe.

Tudu algem kria um kuzinha di Praia, ma ninhum ka tem seka ku poi pe na kel bram-bram, Nhu Pulenta Bia tinha fastiu di kuzaz material "dinheru e kuza di xuxu", "el ki ta sipara familias, ki ta da kabu amizadi". Dimingu e omi di fe, palavras di Nhu Pulenta Bia e maz ki lei. E Lei di Dioz.

Boita e na domingu di tardinha, Juana tinha um prima na Palmareju ku kaza ku kantu kuartinhus ke ta lugaba rapariginhas. Maria Presioza e si nomi, e ta fika na um kuartu ku kuzinha ku kaza banhu, to ki Juana txiga kolxom stendedu pamo kama e pikinoti.

Maria e fidja Dona Presioza, kantu si pai mori e ruma troxa e dixi Praia, tudu simana e ta manda ku si prima dinheru, ropa, kuzaz di kaza pa si mai. Dona Presioza ta abri boka ku orguliu
— Nha fidja e trabadjadera, sem skola sem, kunhesimentu, sem ningem, dje orienta bida na praia. —

Na Kutelu tudu algem tinha um familia na Praia ma ninhum ka volta, uns orienta otus ka mesti nem fla. Tinha um kuza la Praia, pa riba Kebra Kanela, ki Dimingu tem gana konxi antiz mori. Palku di Papa João Paulo II. E obi ta fladu ma tem ti statua di sanu Papa. Vizitas ke fazi la Fatima, misa ke ta daba na kantu lingua, si pais ki era Polonia, Dimingu ta obi kaladu storias ki Nhu Pulenta Bia ta konta.

Fransedja dja soma la riba ta bem. Tem um hiace ki ta anda sima ke ta bua, es pol nomi Fransedja, si kondutor era um moz la di Praia, Txokas, rapaz stilozu ma kabesa ka bali um tistom. E tinha fama na fla raparigas kuzaz bunitus i daz bons prendas. Juana si ki gosta. É um brinku, um pulsera, batom di bexu, karterinha.

Fransedja txiga num ai, manduxus pa riba, Juana na banku frenti djuntu ku Txokas, dispidida rinkada Praia. Bem e ti manham. Dimingu da rinkada sim ki Fransedja aranka, oji dia e tarefadu. Palu sta speral pes bai Lugar. (continua...) (Parte 1) (Parte 2) (parte 4) (parte 5) (parte 6) (parte 7) (parte 8) (parte 9) (parte 10)