BEM DI FORA - PARTE 6

Movimentu frakisi ma Juana dja teni kuaji tudu rumadu. Di kel ke trazi pa venda dja resta menus di metadi, restu e pa manham. Maria soma na kel mesmu skina, dentu kel, fala, beju, ruma, meti na karu, rizu, txigadu Palmareju nem Juana ka da konta. E fika ta spia Maria e ka sabi se ta fika kontenti o tristi.

Kantu ez txiga kuartu Maria stendi bistidu, sapatu, mala ku brinku riba kama. Tudu novu ke trazi, e fla Juana ma logo ez tem ki bai kompu kabelu ku unha...
— Kel rapaz ki staba ku bo ki nu bem djuntu e bu moz? — Juana pergunta.
— Na, e nha amigu. —
— Amigu ta da beju na boka? —
— Na noz e si. — Maria rispondi, da kosta ba kuzinha.
— kel omi na dumingu pasadu ki nu staba djuntu, nhoz ka tinha? —
— Ma Juana minina, bu sta mo nha mai na tempu Kutelu. Ka bu faxi nau, oji bu ka ta bai num kau. N'kre lebau munti kau sabi pa bu divirti, bu tem ki sta bazofa, gentis grandi sta bem buskanu. — Juana pega bistidu na mon e poi ta pensa ma la na Kutelu e ka ta divirti di ninhum manera, e so afazeris na kaza, sta mal bistidu noti manxi, oji e ka kre straga tudu.
— Forti bunitu Maria, keli e munti dinheru.—
— Nha amigu ki paga ma mi ki skodji. E tudu pa bo. Bisti pan odja mo ta fika. Ka bu skesi nu tem ki bai Fazenda maz logu...

Dja bai tempu ki rapaziz ta xintaba tudu djuntu ta bebi ta konta partis. Dimingu, Palu, Xanu, Benvindu, Numaia, Mani staba numa parodia dentu kel tardi. Numaia ku Mani e maz bedju ma ez gosta di sta djuntu ku rapaz nobu ma komu ta stadu kada um pa si ladu ez ka ta ranja um tempu pes xinta sima oji. Mani labanta ku si kaneka dentu mon e poi ta tora pe ta kanta. E funana ki sta toka, Benvindu sai na porta ta badja ta djata.
— "Duku dja bem, duku dja bem..."— Dentu kel ez ka da konta Don Pedro Barboza ki bem txiga. E staba la Kalheta na negosiu.
— Nu ta kumi nu ta bebi nu ta pila badju. Poi panela riba la. — Dom Pedro e omi dixpaxadu, fadjadu tambi, ki dje manda pripara kuza kumi bedju. Oji tem festa. (continua...) (parte 1) (parte 2) (parte 3) (parte 4) (parte 5) (parte 7) (parte 8) (parte 9) (parte 10)