BEM DI FORA - PARTE 2

La na Kutelu Renki Baboza, Dimingu era omi grandi, ka tinha um kaza ke ka poi si mon, ke ka dexa um pingu suoris. Um garafom di grogu, um bindi kuzkuz, um liton, radiu di pilia, bensom di Nhu Pulenta Bia, era pagamentu ke ta lebaba pa kaza. Juana ta sai di kabesa.
— Flam si n'ta bisti radiu? Inda por sima radiu bedju. E grogu ki n'ta da minis pa toma ku kuzkuz? Bo e bakam. — Juana gosta di dinheru, e gosta di sta sima rapariginhas di Praia.

Na Kutelu tinha duzi kaza, tudu di padja fetu di pedra, sem luz nem agu dentu. Tinha trez num renki, ki era kaza Dimingu, kaza Palu ku kaza Dona Presioza, um tia di Juana, mudjer dretu, ta fla santa. Maz pa riba tinha kaza Nhu Pulenta Bia, kaiadu, pintadu di branku ta fla igreja.

La riba Kutelu, um renki kuatu kaza, gentis Barboza, ku ses trapitxi ku kural di limaria. Pa baxu ka Dimingu, ta dixi doz renki karapati, era kaza Numaia nha Nina ku kaza Mani di Roza, unha ku karni, ma tem dias ki es ka podi odja kumpanheru, ez tinha ses transu pamo um storia di um terenu mal kontadu.

Maz afastadu bera uns purgera ki plantada, era kaza Nha Pala, mudjer mal odjadu pa Nhu Pulenta Bia pamodi ramedi ku rezas ke ta fazia, "kuzaz di xuxu". Si ki Nhu Pulenta Bia ta flaba. Ma era Nha Pala ki povu ta spiaba to ki orasom ka kura.

Oji Juana sta denti raganhadu des ki manxi, bespa dixi Praia, ta odjal ta farta Dimingu tudu vontadi. Palu era trosentu, e staba la lugar ku Dimingu so ta poi lumi.
— N'ba Praia ta dexa Juana sábi. Tudu sexta-fera e ta sta moda rapariginha bespa kazamentu. (continua...) (parte 1) (parte 3) (parte 4) (parte 5) (parte 6) (parte 7) (parte 8) (parte 9) (parte 10)