BEM DI FORA (PARTE 11)

Dimingu txiga kaza sem kamiza retu kintal nem e ka odja keju riba meza so presa ba laba tra puera di korpu, Dia foi difisil. Sábi ma difisil. Kada kaneka d’agu riba kabesa era sima ke sta batizadu, pa limpa korpu ku alma. Dipoz di banhu e panha si kanderu di pitroliu e kamba kuartu maz diskansadu. Manham ta labantadu sedu, na fora diskansu e trabadju.

Porta diskoteka staba bupu di algem, tinha Feru Gaita ku Suzana ki bem fazi lansamentu ses trabadju. Maria pega Juana dentu mon ez kamba. Jimy ku Kareka bai di pa frenti ti fundu di salon, la na zona VIP dja staba um meza priparadu pa ez. Juana staba enkantada ku luz, muzika i pesoas ta badja ki dje fika sima mininu na loja brinkedu, ta djobi pa tudu ladu sima ke primeru i ultimu bez ke sta poi pe na kau di kela.

Ka dura txeu algem pegal na brasu, era Txokas, ku munti koru e tra Juana pa badja um koladera ma vergonha ka dexal e flal ti dipoz. Kombersu bai kombersu bem, um kopu pa li otu pa la, Jimy ba ta ganha konfiansa poku poku.

Xanu ku Benvindu txiga riba numa rabolisu ta diskuti ez kala ketu kantu ez da ku Don Pedro sakedu na porta.
— Undi Ana? —
— Nu dexal li na kasa na kantu nu ta sai. — Xanu djobi Benvindu ta spera pe fla algun kuza.
— E ka bai ku noz. —
— E debi sta la ku miniz di Juana la na Fatinha. E ta ba pundez manenti, miniz la krel txeu. — Nha Bibina rispondi la di sala ku si kaneka xá di ortelan dentu mon.

Dentu kuartu na luz fusku, Dimingu sima ki da konta ma sta algem detadu na kama.
— Juana e bo ki sta la? Ki ora ki bu txiga? — E soti baxu lensol pe pega si preta pe amal sima ki manham ka ta manxi. Noti la kutelu Renki Baboza staba susegadu ta fla simiteriu, num alma na txada pa konta storia. Palu da rinkada ba Kova, tinha um festa la kasa um minina ki kaba kursu na Praia, kuza e ti manxi. (continua...) (parte 1) (parte 2) (parte 3) (parte 4) (parte 5 ) (parte 6) (parte 7) (parte 8) (parte 9) (parte 10