BEM DI FORA (PARTE 12)

Dipoz di trez pe di badju, doz muzika di Ferro Gaita ku munti kopu ki bem, gentiz rizolvi bai ses kaminhu, retu Prainha, kaza Kareka. Juana ka kala um minutu ta konta Maria tudu kuza ke odja oji ke gosta txeu, ke poi Jimy ta bai el so na karu.

Kareka mora el so na um duplex bem ekipadu ki Juana kantu entra fika boka abertu, ez e arkitetu, el ku Jimy ku ixkritoriu la Palmareju. Kareka subi ku Maria la sigundu pizu, Jimy fika ta mostra Juana restu kaza.
Kaza tamanhu dipoz di tudu volta ez para la na bar ki ta fazi ligasom ku kuzinha, Jimy fazi di impregadu e sirbi doz bebida pez toma. Juana ta bebi ta ri.

Palu bem txiga kuazi ta manxi, e odja Ana ta sai di kaza Dimingu ta entra na kaza Dona Presioza, ku sapatu dentu mon. Komu e staba meiu ku sonu meiu kenti nem e ka poi ta pensa txeu. Priokupasom era soti riba kama.

Juana korda ta sprigisa sima algem ki durmi bom sonu, estranha lugar kantu e abri odju. Na labanta di kama e da konta me ka tinha ropa. E bisti num faxi, panha ses kuzas, sai di kuartu num korida ta djobi porta rua. Jimy ku Kareka dja staba la Sao Filipe, es bai djobi um obra kes tinha. Maria staba na kuzinha ta fala na movel ke tevi ki sai ta kori traz di Juana ke tevi ki lebadu kaza pe kalma.

La na kaza Maria, dipoz di banhu tomadu, xintadu riba kama, Juana kria rispostas.
— Maria kuze ki kontisi? Ami n’toma pontxi, staba muzika, nu badja, dipoz n’korda riba kama la di riba so na kalsinha... — Maria ri.
— Na ka bu ri nau. Sera ki...? — Maria panha si kartera longa Juana kuza ke tra la dentu.
— Toma. Keli e di bo. —
— Kinzi kontu? Di meu pamodi? E pagamentu di kuze? –— Maria nada ka fla. E ba ta bebi si xa ta spia Juana pa riba kaneka.

Dimingu korda sol dja sta riba ta bai, kantu e vira na kama nada e ka atxa. Num korida e kori kaza interu ningem ka staba. E bai ti rua traz di Juana. Palu staba na si porta xintadu.
— Abo? Kuze bu ata ri? Bu ka odjam Juana? —
— Juana? Inda bu ata durmi? Juana ka sta la Praia? Bem flam li kuze ki Ana di Don Pedro ata fazeba, kuatu ora madrugada, la na bu kasa? —
— Ana? Mi ki ka odja Ana. — Dimingu kamba kasa Dona Presioza, Palu si traz.
— Nha tia, undi miniz? — Eris bai Kova ku Ana. E bem djobez onti e fika li ku mi na kombersu e durmi li. Aliaz ami n’durmi n’dexal li na sala. N’staba kansadu. Ez bai ku kuzkuz kenti pa bendi. Si ki n’kaba di fazi pastel n’ta bai ter dez. — Dimingu djobi Palu ki staba ku grasa. La na rua, Dimingu poi mon na kabesa ta anda di um ladu pa otu.
— Nha irmon, abo djo pinta manta, ma si Don Pedro ba ti da konta kuze ki djo fazi, ka ta resta um padaz di bo pa konta storia. (continua...) (parte 1) (parte 2) (parte 3) (parte 4) (parte 5 ) (parte 6) (parte 7) (parte 8) (parte 9)