BEM DI FORA (PARTE 13 – FIM)

Dumingu pasa ku trankuilidadi pa tudu algem, kada um ku si priokupasom. Txiga ora dispidida.
— Nha prima kel dinheru li e di bo. Modi ki bu ganhal so Deus ki sabi i ningem ka tem nada ku isu. Kantu ku fazi na venda des viaji? Nem sinku kontu. Pur isu dexa disparati di fla ma bu ka kre. Toma. — Maria meti Juana kel kinzi kontu, ku maz sinku di sel, dentu mala ez bai prasa di Hiaci.

Dimingu pasa tardi la kaza Nhu Pulenta Bia, komu di sedu e ka poi pe la pa djudal na pregasom e rizolvi kompensa. Kantu e txiga kaza di tardinha Juana dja staba la ta mostra miniz kuzaz ke trazez. Ana staba djuntu ku el. Ningem ka papia. Tudu fika ta spia kumpanheru ku gana abri boka ma nada ka ta sai. Noti bem kai, Ana subi Kutelu, Juana pasa restu di noti ta fla Dimingi pez muda pa Praia. Ma la e midjor pa ez tudu. Dimingu ka kria nem obi e fika ta pensa na kombersu ki Nha Pala tevi ku el.

Simana ba ta pasa, Juana ku kel mezmu kombersu di Praia , Ana la tudu santu dia, ki poi Dimingu maz dizorirntadu inda. Ningem ka fala nada di kel fim di simana ki pasa ti ki txiga kuarta fera, Mani ku Numaia tranka otu gera ki Mani lebadu Somada. E bem ku sinku pontu na testa.

Dona Presioza atxa um karta di Maria ki txiga kinta fera, ta fla me sta imbarka pa Holanda. Um holandes ke bem konxi kre lebal pa Europa ki dje fala na kazamentu ku fidju propi. Imbarki e sabadu di noti.

Txiga sexta fera, kel mesmu storia di tudu simana, preparativus pa dixi Praia. Juana staba ku empenhu maz ki tudu bez ku Ana djuntu ku el ta djudal ki Dimingu nem ka para na kaza. Sabadu manxi ku bom tempu Juana ku Dimingu sta sakedu na bera strada ta spera fransedja. Ez ba ta kombersa ta fazi tempu, kantu txiga ora, Juana imbrasa Dimingu rixu e bai. Fransedja bua. La na kaza, Dimingu kamba kuartu dizanimadu pa bisti pa ba atxa Palu la lugar. E atxa um karta riba kama. Era di Juana. Kantu e ka le e kori pa kuartu miniz, guarda-fatu staba baziu. E xinta na txom e pila txoru.

(FIM)

ta continua… Dez anu dipoz, em brevi. Ka nhoz perdi) (parte 1) (parte 2) (parte 3) (parte 4) (parte 5 ) (parte 6) (parte 7) (parte 8) (parte 9)